श्री गुरुमाऊली स्वामी स्वरूप स्वानंद जी यांचे चरणी वंदन आणि सर्वांना नमस्कार.

पावस शिबिर आयोजन, नोव्हेंबर 2025 :

ग्रुपमध्ये असणाऱ्या सर्व साधक वर्गास कळविण्यास अत्यंत आनंद होतो की, श्री सद्गुरू स्वामी स्वरूप स्वानंद जी यांच्या मार्गदर्शनाखाली, दिव्योन्मेष सत्संग आयोजित स्वरूप ध्यान अभ्यास वर्ग/शिबिर म्हणजे ब्रह्मज्ञानाचा विष्णू यज्ञच जणू पावस येथे, परम गुरु श्री स्वामी स्वरूपानंद यांच्या दिव्य चैतन्यमय उपस्थितीत, काल संपन्न झाला. 27, 28 आणि 29 नोव्हेंबर अशा तीन दिवसांमध्ये श्री सद्गुरू माऊलींनी मोठे श्रम घेऊन, उदार अंतःकरणाने आपल्या आजवरच्या संपूर्ण साधनेचे, तप:श्चर्येचे, ज्ञानाचे , गुरुभक्तीचे तसेच गुरूकृपेचे जणू एकत्रित सारच सर्वांसमोर मांडले!!

या संपूर्ण तीन दिवसीय शिबिराची, मला थोडक्यात मांडता येणारी खालील वैशिष्ट्ये :

1. आखीव आणि कालबद्ध नियोजन

2. विषय अधिक स्पष्ट करणाऱ्या सुसंगत काव्यरचनांचे, व्हिडिओ रूपात सादरीकरण

4. श्रोत्यांच्या मनबुद्धीचा ठाव घेणारी, हृदयस्पर्शी संवादशैली!

5. भावभक्ती पूर्ण भाषाशैली

6. अवघड तत्त्वज्ञान सोपे करून सांगण्याची हातोटी

7. सहजपणे श्रोत्यांशी संवाद साधण्याची कला

8. थोडक्या शब्दांत मोठा आशय व्यक्त करण्याचे कसब

9. सर्वांना वेळेवर चहा, नाश्ता आणि जेवणाची सुंदर, सात्विक आणि गरमागरम व्यवस्था (स्वामी स्वरूपानंद सेवा मंडळ तर्फे)

10. कलात्मक सादरीकरण आणि आधुनिक तंत्रज्ञानाचा वापर

11. अध्यात्म संकल्पना व आचरण यातील नेमकी तफावत आणि ते दूर करण्यास लागणारी मानसिकता तयार करण्यासाठी, अचूक मार्गदर्शन

12. मूळ ज्ञान, सत्य ज्ञान, शक्ती आणि गुरुतत्वकार्य यांचे सुस्पष्ट निरूपण

13. ओघवती, रंजक आणि दैनंदिन उदाहरणे देऊन विषय मांडणी

14. मानव जीवन रहस्य

15. कुंडलिनी जगदंबा शक्ती आणि तिचे नेमके कार्य

16. नाथ परंपरा, सिद्धांनी सांगितलेली सोsहम् साधना

17. गुरुकृपेच्या अनुभूतींचे वर्णन

18. आत्मज्ञानप्राप्तीचे गमक आणि त्याचे कालबद्ध ध्येय ठेवण्याची गरज

19. श्रोत्यांच्या शंकांना अचूक आणि वैयक्तिक मार्गदर्शन

20. शिबिरार्थींचे मनोगत तसेच निर्गुण आरतीने समारोप

21. स्वामी स्वरूपानंदांच्या नित्य पाठाचा आणि आत्मपाठाचा प्रसाद लाभ

या विष्णू यज्ञात, पूज्य गुरुमाऊलींसमवेत आम्ही उपस्थित सर्वजण आकंठ बुडालेले होतो! स्वतःच्या तब्येतीची परवा न करता, श्री माऊलींनी मुक्तपणे ज्ञानमौक्तिकांची भावरंगी पखरण करीत, सुंदर ध्यान वर्ग संपन्न केला!

सद्गुरू स्वामी स्वरूप स्वानंद जी यांच्या ओजस्वी वाणीतून, आत्मप्रकाशातून, महाविष्णूंच्या तत्व जाणिवेतून लाभलेल्या सर्वोच्च ज्ञानशलाका, आम्हा सर्व शिबिरार्थींच्या हृदयास नित्य प्रकाशित करीत राहोत. श्री सद्गुरूंनी दाखवलेल्या मार्गावर सतत साधनेतून चालत राहण्याचे धैर्य व मानसिकता लाभो, हीच गुरुतत्वाकडे प्रार्थना!

आदरणीय श्री जयंतराव देसाई यांचेही...सर्वोत्तम शिबिरस्थळ व्यवस्था, बैठक आणि प्रोजेक्टर योजना, संपूर्ण जेवणखाण व्यवस्था तसेच अमूल्य अशा स्वामींच्या नित्यपाठ प्रसादभेटीबद्दल आणि सगळ्यांना प्रोत्साहित केल्याबद्दल हृदयातून कृतज्ञता आणि आभार

सत्संगामधील गुरुबंधू, गुरूभगिनींना तसेच सर्व उपस्थित शिबिरार्थींना आपल्या सहकार्यासाठी मनःपूर्वक नमस्कार आणि आभार

श्री सद्गुरू माऊलींना अर्पण.

सौ.साक्षी(दिपाली) बादरायणी,
दिव्योन्मेष सत्संग, पुणे

२३ ते २९ जानेवारी २०२४ ह्या कालावधीत श्रीक्षेत्र पावस येथे दिव्योंन्मेष सत्संगातर्फे अभंग ज्ञानेश्वरी पारायण तसेच आध्यात्मिक शिबीराचे आयोजन करण्यात आले होते. पुणे तथा परगावाच्या ११० साधकांनी ह्या शिबीराचा लाभ घेतला. अभंग ज्ञानेश्वरी पारायण आणि त्याच्या अनुषंगाने स्वामी स्वरूप स्वानंद ह्यांनी ज्ञानेश्वरीचे अंतरंग उलगडून सांगितले.

त्यानंतरच्या रोजच्या ज्ञानसत्रात " ध्यान अभ्यास वर्ग " ह्याचा सर्व साधकांनी लाभ घेतला. दृकश्राव्य अशा माध्यमातून ह्या अभ्यासाची, ज्ञानेश्वरीतील संकल्पनांची सांगड घालत, स्वामी स्वरूप स्वानंद यांनी सर्वांसमोर उत्तमरित्या मांडणी केली. अतिशय शिस्तबद्ध आणि उत्साहात हे शिबीर यशस्वी पार पडले.