पुण्यातील इंजिनिअरिंग कॉलेज मधून १९७८-७९ साली बी. ई. (मेटलर्जी) ही पदवी प्राप्त. प्रथितयश कंपन्यांमधून नोकरी करून वयाच्या तिसाव्या वर्षी पुणे येथे स्वतःचा व्यवसाय करीत असतांना व्यवसाय वृद्धी व व्यक्तिमत्वाच्या विविध पैलूंचा विकास साधला.

डॉ. पांडे यांनी पुण्यातील टिळक महाराष्ट्र विद्यापीठात इंजिनिअरिंग कॉलेजमध्ये प्राध्यापक (विभाग प्रमुख) म्हणून आठ वर्षे शिक्षण क्षेत्रात काम केले. याच काळात आन्तरप्रिन्यूअरशिप या विषयात संशोधन करून त्यांनी पीएच. डी. प्राप्त केली. लहानपणापासून संत साहित्याच्या अभ्यासाची व साधनेची आवड, त्याचबरोबर उत्तम भाषाशैली व वक्तृत्व प्राप्त.

डॉ.सुधीर पांडे यांच्या आध्यात्मिक व्यासंगातून तथा प. पू. स्वामी स्वरूपानंद, पावस यांच्या अनुग्रहातून त्यांच्या आध्यात्मिक साधनेला बळकटी आली. तसेच प. पू. स्वामी विद्यानंद हे वडील असल्यामुळे लहानपणापासून त्यांच्या व्यक्तिमत्त्वाला आध्यात्मिक झालर प्राप्त झाली. गुरुकृपेतून पल्लवीत झालेल्या त्यांच्या आध्यात्मिक व्यक्तिमत्त्वाला, मनन चिंतनाची आवड थेट निदिध्यासापर्यंत घेऊन गेली. अनुताप, निश्चय तथा आत्मशोधाच्या शक्तीच्या जाणिवेतून त्यांचे भावविश्व आकार घेत गेले. यातूनच साकार झालेले आत्मविचार ग्रंथ रूपात आणले गेले. व्यावहारिक जीवन आणि अध्यात्म यांची जवळीक साधली गेली.

आध्यात्मिक जीवन One who chooses the God is already chosen by the God – ही इंग्रजी म्हण गुरुकृपांकीत डॉ. सुधीर पांडे यांना तंतोतंत लागू पडते. त्यांच्या आध्यात्मिक अनुभूतींना तथा समग्र व्यक्तिमत्वाला तसेच “दिव्योन्मेष-सत्संग” या सामाजिक सत्संग उपक्रमाला सद्गुरुंचे कृपाछत्र कायम लाभले आहे.

• १) डॉ सुधीर पांडे यांना १९६९ साली पावस येथील परमहंस सद्गुरु स्वामी स्वरूपानंद यांचा अनुग्रह प्राप्त झाला आहे. ( त्या वेळी त्यांचे वय १५ वर्षाचे होते. १९७४ पर्यंत त्यांना स्वामींची सेवा तथा सत्संग याचा लाभ घेतला आहे.)
• २) स्वामी विद्यानंद हे त्यांचे वडील होते. लहानपणापासून अध्यात्म संस्कारात डॉक्टरांचा पिंड जोपासला गेला आहे.
• ३) २०१३ मध्ये डॉ सुधीर पांडे यांनी त्यांच्या आध्यात्मिक व्यासंगासाठी व गुरुकृपेतून आपला व्यवसाय बंद केला व पूर्णपणे आध्यात्मिक साधनेला वाहून घेतले. यातूनच त्यांच्या आध्यात्मिक अनुभूतीचा परिघ वाढत गेला.

आध्यात्मिक शिबिरे, सोहम साधनेचे ध्यान अभ्यास वर्ग तसेच सहज सुंदर प्रवचने म्हणजे आध्यात्मिक सिद्धाची ईश्वरी पूजा थेट त्या परब्रह्मा पर्यंत घेऊन जाते. आधुनिक विज्ञानाला अध्यात्म विज्ञानाच्या संपूटात घेण्याचा त्यांचा हातखंडा तरुण साधकाला विशेष भावणारा आहे. ही सर्व गुरुकृपाच नव्हे का!

• ४) डॉ. सुधीर पांडे यांच्या सतत मनन व चिंतन या साधना प्रत्ययातून त्यांच्या प्रज्ञानमय जाणिवेतून परब्रह्माची अद्वैत जाणीव प्रवाहित होत जाते.
• ५) त्यांच्या या साधन सातत्यातून त्यांना संतांची दर्शने व आध्यात्मिक गुरुकृपेची अनुभूती प्राप्त होते.
• ६) स्वामी स्वरूपानंद यांनी त्यांच्यावर केलेल्या आध्यात्मिक कृपेच्या आनंदात ते विभोर होतात. त्यांच्या रचनेत्या "अद्वैत-उन्मेष" आणि "प्रज्ञा स्फुर्त ईश्वरी काव्य" या काव्य संग्रहात त्यांनी आपल्या आध्यात्मिक अनुभूतीचं संवाद केलं आहे, ज्यात त्यांच्या दिव्य आणि आध्यात्मिक गुरुंच्या कृपेची आदान-प्रदान दर्शवली आहे.

२०२० च्या दिवाळीतील त्यांचा एक अनुभव.

” प्रकाशलेले हे मंदिर, देवतांच्या चेहेऱ्यावरचे हास्य आध्यात्मिक भाव प्रकट करतात असे वाटते. आपली कर्मभूमी हीच असावी असे वाटते. नियतीच्या उदरातील भविष्य वेध हाच आताचा तिचा संदेश असतो. साधकाने तो नक्की अभ्यासावा.

सद्गुरू माझे नित्य जागरूक | न सोडी मजला हे विशेष |
आम्ही काय करावे न करावे | सांगे मजला करुनी निःशेष ||
त्याच जाणीवे साधन आता | जाणुनी, स्पंद नव्हे तो संदेश |
मीच तुझ्या कर्तुत्वे उभारी | तूच होऊनि तव आदेश ||”

स्वामी विद्यानंद यांनी तर डॉक्टरांना आध्यात्मिक कार्यास भरभरून आशिर्वाद व पुढील मार्गदर्शन केले आहे. आदिनाथांपासून चालत आलेल्या, ज्ञानेश्वर महाराज तथा स्वामी स्वरूपानंद यांनी क्रांत केलेल्या ” सोहम साधनेचा” अनुनय ते करतात.